ILUSTRAD/AS: DE BELGRADO A FRANKFURT

A exposición ILUSTRAD/AS: unha mirada á creación feminina na ilustración de vangarda segue coa súa andaina itinerante polas diferentes sedes do Instituto Cervantes. Actualmente atópase en Belgrado, onde foi inaugurada o pasado 14 de maio con un gran éxito de público e repercusión en medios, tendo unha moi boa acollida na capital serbia. A exposición poderase ver na céntrica sala de exposicións do Instituto Cervantes de Belgrado ata finas de agosto. Xa en setembro, a exposición viaxará a Frankfurt, onde temos previsto inaugurala o vindeiro 23 de setembro.

VI EDICIÓN UKP DAY

O 4 de xuño terá lugar en Ribadavia a sexta edición do Ukp Day!

A británica Alondra Bentley e Francisco Nixon, o exlíder da afamada banda dos noventa Australian Blonde, completan un programa musical que contará tamén coa presenza do recoñecido artista local Emilio José, que ofrecerá unha sesión DJ especial, o portugués André Julio Turquesa e os galegos Mallou, Helen & Shanna e Nelson Quinteiro. Un programa de actuacións que ten como sinal de identidade a exclusividade dos seus concertos, xa que os artistas adaptan o seu repertorio ao ukelele, ou cavaquinho portugués, ofrecendo así unha experiencia única nun marco incomparable como é o Castelo medieval de Ribadavia.

Ademais dos concertos, durante o festival levaranse a cabo outras actividades complementarias como os obradoiros infantís, unha serie de intervencións artísticas en directo de ilustración e graffiti e un mercado creativo de deseñadoras.   

Ukpday é un deses festivais con encanto, que apostan por contidos diferentes e orixinais. Esta edición volve ter no Concello de Ribadavia o seu principal impulsor e promotor. Ademais, Cervezas Alhambra apoia novamente este evento invitando a saborear as súas referencias ao compás das mellores propostas musicais. O festival tamén conta coa colaboración da Xunta de Galicia para difundir as ventaxas do Carné Xove; así como de Viña Costeira e Compostela Campers.

A sexta edición do Ukpday vai ter lugar en horario de tarde, a partir das 17:00h e cunha entrada de pago a un prezo popular de 5€, que será de balde para os menores de 12 anos.

ACTUALIZACIÓN POST: preme na imaxe para ver o vídeo reumo desta edición

2021, o ano das ILUSTRAD/AS

Remata o ano, e sen dúbida, 2021 foi un ano cheo de ilustración cósmica, principalmente pola exposición itinerante de ILUSTRAD/AS: unha mirada á ilustración feminina de vangarda. Unha exposición comisariada para o Instituto Cervantes, para exhibila nalgunhas das sedes internacionais da entidade, e que arrancou a principios de ano no Instituto Cervantes de Nova York, ao que lle seguiron Chicago, París e Manchester, onde se encontra agora mesmo exposta ata o 26 de febreiro de 2022.

ILUSTRAD/AS xorde da segunda edición da Mostra Internacional de Ilustración Contemporánea como unha exposición independente, con voz propia, onde se reúnen a 12 das ilustradoras máis punteiras da actualidade e que formaban parte da mostra. Son artistas que destacan polo seu estilo persoal e que son as creadoras de moitos dos libros ilustrados máis aclamados na actualidade. Un traballo editorial que está presente na exposición, compartindo espazo con outros tipos de traballos máis persoais e creativos, onde moitas das ilustradoras exploran os propios límites da ilustración, ou introducen novos formatos: falamos de serigrafías, colaxes, cerámicas, risografías, debuxo dixital, esculturas e intervencións que conviven coa arte máis tradicional do debuxo en acuarela, lapis de cores ou tinta chinesa.

En conxunto, a exposición ofrece un achegamento á ilustración contemporánea actual, poñendo o foco no traballo feminino que, sen dúbida, vai á cabeza da vangarda tanto na renovación editorial como na procura de novos formatos e técnicas. Salientando, ademais, o traballo autoral galego, xa que a metade das artistas escollidas son de Galicia ou afincadas na nosa comunidade. Falamos de Bea Lema, Iria do Castelo, Iria Fafián, Lara Lars, Nuria Figueiredo e Pelo di Cane, cuxas pezas viaxan con esta exposición como embaixadoras do talento galego. Completan a escolla as artistas nacionais: Helena Pérez García, Malota, María Hesse, Sara Landeta, Sonia Pulido, e a chilena Luísa Rivera.

A nivel conceptual, ILUSTRAD/AS xira ao redor de temas universais como a nosa relación coa natureza ou a mirada en clave feminista do rol actual da muller e a maneira de representala.

A exposición ven acompañada dun catálogo deseñado pola artista Rebeca Arce e que se pode adquirir no seguinte enlace: https://www.unebook.es/es/libro/ilustradas_277908

No 2022 continuaremos con esta viaxe tan bonita e enriquecedora. Anunciaremos as novas paradas en breve 😉

Así foi o Ukp Day de 2021

No último mes deste ano queremos rememorar un dos eventos máis senlleiros do Gato Cósmico, como é o Ukp Day, o festival que supuxo a evolución do primeiro proxecto cósmico: o Ukelele Kit Project, e que volveu centrar nese instrumento a xornada do primeiro sábado de xuño. Despois de telo cancelado polo Covid na edición de 2020, no 2021 conseguimos sacalo adiante cun formato moi reducido e controlado sanitariamente para evitar riscos innecesarios. Os protagonistas foron os galegos Néboa e o artista catalán Enric Montefusco, que ofreceron dous concertos únicos no Auditorio do Castelo de Ribadavia. Agora, que xa temos a vista na edición de 2022, queremos compartir por aquí o vídeo resumo desta edición tan diferente como especial

Ademais, debido á pandemia e a cancelación da edición do 2020, decidimos dar un paso máis na conexión do festival con Portugal realizando o documento audiovisual da Ruta do Cavaquinho: o son que conecta Braga con Ribadavia, co que buscamos resaltar de maneira simbólica e creativa a conexión que se establece entre a cidade portuguesa de Braga, lugar de orixe do cavaquinho (posteriormente coñecido como ukelele) con Ribadavia, onde realizamos o Ukp Day.

O documental comeza coa creación de maneira artesanal dun cavaquinho nun dos talleres máis antigos e famados de Braga, o do luthier Alfredo Machado. Este cavaquinho é recollido por unha rapaza que emprende un percorrido que comeza en Portugal e que conecta na fronteira de Galicia co rio Miño, o cal seguirá a contracorrente ata chegar ao seu destino, Ribadavia. O camiño elexido transcorre por espazos de gran beleza vencellados ao Miño, poñendo o foco na riqueza natural e patrimonial do interior de Galicia. Nestes lugares, a rapaza protagonista, irase atopando con algúns dos artistas que tocaron en edicións pasadas do festival como os galegos Momboi, Astrogirl, Silvia Penide ou o portugués Julio Turquesa. Catro cancións diferentes que teñen en común o ukelele e que crean metafóricamente un único son que conecta o pasado tradicional co presente.

O documental foi realizado ao abeiro do Fondo de Proxectos Culturais Xacobeo 21.

Pronto anunciaremos novas da edición de 2022, permanecede atentos!

Exposición A Caza

O pasado 21 de xaneiro inauguramos a exposición A Caza de Alberto Vázquez, artista coruñés, gañador do Premio Castelao de Banda Deseñada en 2019, e agora nomeado aos Goya coa curtametraxe de animación Homeless Home. Esta mostra componse de 22 pezas orixinais realizadas en tinta chinesa sobre soporte de pvc, que proveñen dunha exposición comisariada por Jaime Oiza para Viñetas do Atlántico 2020 e cedidas para a actividade FELiiC, Feira de Edición e Libro Ilustrado que organiza a Deputación de Coruña no marco da III Mostra Internacional de Ilustración Contemporánea MiiC3 CROMÁTICA que está a ter lugar na Sede Afundación de Santiago de Compostela.

“Mundo propio e persoal”, “debuxo expresivo que xera unidade narrativa” e “imaxes que se manteñen na retina do lector”. Con estes argumentos o xurado da 14ª edición do premio Castelao de Banda Deseñada decidiu distinguir A caza, do coruñés Alberto Vázquez.

Ambientado nunha contorna selvática, A caza penetra na historia dun home primitivo que persegue un animal. Mediante unha narración chea de metáforas e unha gráfica que oscila entre a abstracción e a figuración, trátanse temas universais como o conflito entre ser humano e natureza, a contaminación ou a emigración.

Destaca pola utilización dun grafismo moi sólido realizado coa técnica do sumi-e con tinta chinesa [técnica de pintura xurdida no século II na China, considerada ‘arte do esencial’]. “Alberto Vázquez sorpréndenos cun cambio de rexistro que remite aos clásicos da temperá novela gráfica, como Ward ou Masereel, pero que podería  retrotraernos ata Altamira, ou ao relato dun chamán xunto ao lume. Un cómic atávico, poderoso, absorbente e musical”. Afirmou o recoñecido historietista Albert Monteys que, ademais, foi un dos membros do xurado desa edición.

O autor, Alberto Vázquez (A Coruña, 1980), quen tras cómics como Psiconautas ou El Evangelio de Judas, labrouse unha consistente traxectoria de director de animación que lle levou a gañar tres premios Goya coas curtas Birdboy e Decorado, e o de mellor película de animación pola adaptación de Psiconautas, volve ao cómic coa banda deseñada A caza.

Os seus libros foron editados en países como España, Francia, Italia, O Brasil e Corea. As súas creacións audiovisuais obtiveron máis de 60 premios internacionais e foron exhibidas en prestixiosos festivais de todo o mundo como Cannes, Toronto, Annecy,  Clermont- Ferrand, Zagreb ou Park City ( Slamdance).

>> A exposición pode verse ata o 27 de febreiro de 2021 na Sede Afundación Santiago de Compostela (Rúa do Vilar 19). Horario: de luns a venres de 17h e 21h e o sábado de 12h a 14h e de 17h a 21h. Entrada de balde.

Encontros Open MiiC

Presentamos os encontros Open MiiC, que este ano debido á situación de pandemia, leváronse a cabo sen público. O resultado foi unha serie de pezas audiovisuais onde oito das creadoras e creadores que forman parte do proxecto «Cromática. III Mostra de Ilustración contemporánea» #MiiC3, falan das pezas que expoñen, do concepto que hai detrás delas e as técnicas que utilizaron e porqué.

Deixámosvos aquí un vídeo no que recollemos os oito vídeos resultantes e onde aparecen, por esta orde: Abi Castillo, Tina Siuda, Alberto Vázquez, Tayone, Coco Escribano, Oscar Raña, Iris Branco e Agustina Shuan.

Os vídeos foron difundidos na última semana de xaneiro para conmemorar o Día da Ilustración, que se celebra cada 30 de xaneiro coincidindo co aniversario do nacemento de Castelao co obxectivo de poñer en valor o papel dos profesionais da ilustración na industria cultural.

A III Mostra Internacional de Ilustración Contemporánea – CROMÁTICA – pode verse ata o 27 de febreiro na Sede Afundación Santiago de Compostela (Rúa do Vilar 19).

FELiiC, feira de Edición e Libro Ilustrado

O 16 de xaneiro tivo lugar, no marco das actividades que forman parte da III Mostra Internacional de Ilustración Contemporánea, a actividade FELiiC, Feira de Edición e Libro Ilustrado. Por mor da pandemia este ano o formato foi completamente virtual e sen público, retransmitindo en directo dende a planta 2 da mostra.

Este foi o programa:

>> Sesión de mañá, ás 12:30h: charla cos últimos gañadores do Premio Castelao de Banda Deseñada que outorga anualmente a Deputación da Coruña. Participaron: Alberto Vázquez por «A Caza», Martín Romero por «Uxío», Begoña García Alén por «Adeus Amigos» e Andrés Magán por «As Aventuras de Passer P. Malta». Moderou a charla Xurxo Couto, Deputado de Cultura.

>> Sesión de tarde, ás 18:00h: conversa con Coco Escribano, autora do libro «Mujeres Poderosas» e ilustradora seleccionada pola editorial Monsa para formar parte do libro Women’S Club, Art is Powerful. Conduciu a entrevista a comunicadora experta en banda deseñada Neves Rodríguez.

Organiza a actividade a Deputación da Coruña en colaboración con Afundación. Obra Social ABANCA.

A III Mostra Internacional de Ilustración Contemporánea pódese ver na Sede Afundación Santiago de Compostela (Rúa do Vilar 19) en horario de luns a venres de 17h a 21h e os sábados de 12:00h a 14h e de 17h a 21h. De balde.

MiiC na Rúa

MiiC na Rúa é unha actividade que se celebra na popular Rúa do Vilar de Compostela ata o 21 de decembro, impulsada polo Concello de Santiago de Compostela dentro do marco da III Mostra Internacional de Ilustración Contemporánea, MiiC3, que se pode visitar na Sede Afundación da rúa do Vilar ata o 13 de febreiro.

Participan as artistas galegas Abi Castillo e Iris Branco; os galegos Hector Pichel, Tayone, e Oscar Raña; e a arxentina afincada en Galicia, Agustina Shuan. As intervencións serán de carácter simultáneo e terán lugar este sábado en horario de 16h a 21h. Os establecementos que participan da iniciativa son: Espadela, Vestopazzo, Morgana, Astor Decoración, Librería San Pablo e a Sombreirería Iglesias. Todos situados na rúa do Vilar, configurando así unha ruta que se vai poder consultar a través dun código QR en todos os escaparates. As intervencións estarán visibles por un mes, ata o 21 de decembro. 

Á hora de seleccionar aos artistas e os escaparates a intervir tívose en conta tanto os estilos dos propios artistas como o espírutu ou esencia de cada establecemento. Así por un lado temos as combinacións máis abstractas e xeométricas, e tamén as máis coloridas, de Tayone ou Oscar Raña, ou as de tipo máis figurativo, dentro da ilustración máis tradicional, como de Abi Castillo, Hector Pichel ou Agustina Shuan, que apostan ademais polo branco como cor principal das súas composicións. E por último, a inclusión de técnicas máis orixinais como o tapeart, que vai utilizar Iris Branco, e que consiste na utilización de diferentes cintas adhesivas de cores para realizar a composición. Diferentes estilos e diferentes maneiras de compoñer que recollen a esencia da propia mostra, que busca sempre resaltar a ilustración como un dos medios de expresión máis creativos e orixinais que existen.

Con MiiC na Rúa buscamos que a rúa do Vilar se configure como unha extensión da propia exposición, que a mostra saia á rúa e participe dela, achegando a ilustración ao espazo público inmediato que a rodea, e poñendo o foco especialmente no comercio local, tendo en conta a situación tan difícil pola que están a pasar.

MiiC na Rúa tamén conta coa colaboración de Afundación. Obra Social ABANCA e Xunta de Galicia.

E así foi #MiiCnaRúa (actualización post):

App MiiC3

Xa temos lista a app da MiiC3! Unha guía interactiva que axuda a completar o percorrido en sala, con toda a información sobre os artistas, contido multimedia extra e enlaces ás webs dos e das ilustradoras. Ademáis, incorpora unha visita virtual 360 da exposición e toda a información básica de horarios, cómo chegar, etc. 

Con esta app buscamos, por un lado, que completedes a experiencia da visita na propia sala; e por outro, achegar a exposición a todos aqueles que aínda non podedes acceder a Santiago de Compostela para poder vela.

Creada pola empresa galega Kappowsky S.L, a app conta cun exclusivo sistema de xeolocalización de interiores que cubre toda a área expositiva da Sede Afundación Santiago e que se activa co movemento do visitante, amosando a información das obras máis próximas a el. Tamén indica as rutas máis cortas dende o lugar onde está situado o visitante ata distintos puntos da sede (saída de emerxencia, ascensores, etc)

A aplicación está dispoñible para os sistemas operativos Android e iOs e a descarga é completamente de balde. Unha vez instalada non precisa de internet ou datos para utilizala (offline). A aplicación tamén funciona como catálogo online, xa que permite coñecer e acceder aos contidos da exposición dende calquera sitio e lugar do mundo dunha maneira inmediata e intuitiva.

Os contidos da aplicación están dispoñibles en 3 idiomas: galego, castelán e inglés.

ILUSTRAD/AS

Despois de moito esperar, debido á pandemia, hoxe por fin podemos anunciar que o 10 de novembro inauguramos a exposición ILUSTRAD/AS, en Nova York. Unha exposición itinerante que xurde a raíz da segunda edición da Mostra Internacional de Ilustración Contemporánea, #MiiC2, e que temos o pracer de comisariar para o Instituto Cervantes.

A exposición poderase ver no Instituto Cervantes de Nova York dende o 10 de novembro ata o 19 de febreiro de 2021 (actualización: a exposición foi ampliada ata o 31 de marzo de 2021), e a partir de aí comezará a súa andaina por diferentes sedes da institución ao redor do mundo.

ILUSTRAD/AS son: Bea Lema, Helena Pérez García, Iria do Castelo, Iria Fafián, Lara Lars, Luísa Rivera, Malota, María Hesse, Nuria Figueiredo, Pelo di Cane, Sara Landeta e Sonia Pulido.

«Nada nuevo hay bajo el sol, y, sin embargo, nueva es cada mirada nuestra sobre las cosas. Nueva es también la atención que se ha prestado en los últimos años a aspectos de la creación que solían estar subordinados a otros más prestigiosos. La ilustración es uno de ellos; un género emancipado, que ha cobrado importancia propia y relevancia singular en el ámbito de la creación contemporánea. Matilde Rodríguez, comisaria de esta exposición, nos acerca a doce planetas creativos que crean un universo interconectado, como lo está la obra de cada una de estas doce mujeres. Cada una con su propia personalidad, todas habitantes de esa malla de la que habla el ecocrítico Timothy Morton. Una malla que recorren tomando apuntes del natural, aprendiendo de la artesanía más tradicional (del dibujo a la cerámica) e indagando sobre los más oscuros aspectos de la identidad, recurriendo a libros clásicos o a la memoria cultural de las generaciones, para entender el mundo de una forma nueva, creando un folclore íntimo que canta las luces del alma y las oscuridades del corazón. El pensamiento, como nos reveló Rudolf Arnheim, no trabaja sólo con palabras, como ha pretendido una larga tradición filosófica. Lo hace también, y sobre todo, con imágenes que luego podemos traducir o no a nuestro lenguaje. En la obra de las artistas incluidas en esta exposición asistimos al complejo proceso de transformar flashes de sueños, intuiciones y pensamientos en una imagen coherente del mundo, en una realidad transformada y transitable, pensada para hacer más habitable la de afuera, que siempre acecha y acoge». Luis García Montero. Director do Instituto Cervantes

Toda a información sobre a exposición (horarios, dirección, etc): aquí