Benvidos a Irusu Ville!

O venres 31 de maio ás 19:00h inauguravamos a exposición IRUSU VILLE da artista IRIA FAFIÁN no Museo Etnolóxico de Ribadavia, onde tivemos a sorte de contar coa artista, que nos explicou a técnica e o concepto que hai detrás das obras.

61215478_2553167201362818_3433212116994097152_o

Irusu é unha palabra xaponesa que define a situación na que unha persoa simula a súa ausencia cando alguén chama á porta…

A exposición recrea un ambiente misterioso onde quen o visita, dende un punto de vista privilexiado, poderá ver e oír case todo o que está a acontecer.

A premisa desta proposta expositiva é expandir os límites da ilustración mediante a creación de imaxes que traspasen o marco bidimensional, coa intención de sumerxer ó espectador na atmósfera das imaxes. A instalación consiste nun percorrido por catro caixas de luz interactivas onde se misturan elementos que non son propios do debuxo como a tridimensionalidade, a luz, o son, o tempo.

 

A AUTORA // Iria Fafián (Barcelona,1988)
Iria estudou Belas Artes, especializándose en ilustración e artes gráficas. Actualmente diversifica o seu traballo entre o muralismo e a ilustración editorial. Na súa obra persoal vemos unha marcada influencia de artes orientáis, tanto a nivel estético coma filosófico. Conceptos da pintura china, o mundo do Ukiyo-e xaponés, o teatro kabuki, o kamishibai e os relatos fantásticos da mitoloxía xaponesa inspiran moitas das súas creacións. No seu proceso creativo sempre está presente a investigación a nivel gráfico e a búsqueda dalgún resultado sorprendente. Irusu Ville é o seu último proxecto expositivo, no que traballou conxuntamente con Borja Freire, quen fixo o deseño sonoro e toda a parte electrónica.

Iria Fafián tamén participaou na xornada do UKP DAY o día 1 de xuño no Castelo de Ribadavia, intervindo en directo un ukelele.

A exposición pode verse ata o 10 de xullo, de martes a sábado en horario de 10:00h a 16:00h no Museo Etnolóxico de Ribadavia. Entrada de Balde.

 

Así foi o Ukp Day 2019

Ukp Day é o primeiro festival de música de ukelele do Noroeste Peninsular. Unha iniciativa que xurdiu a raíz do primeiro proxecto artístico que fixemos en solitario: o Ukelele Kit Projec (2014), coñecido tamén como UKP 😉

Artistas de Galicia e Portugal déronse cita o pasado 1 de xuño neste festival, que concibimos como unha romaría para tódolos públicos, logrando xuntar nun só día diversas actividades que apostan pola difusión das novas tendencias contemporáneas e o fomento da creatividade dos máis pequenos. 

O gran protagonista da xornada foi o ukelele, un instrumento que colleu fama en Hawai pero que ten a súa orixe no cavaquinho portugués, de aí que a presenza de artistas do país veciño sexa unha constante dentro do programa. Este ano, a lisboeta Rita Braga e a vimaranense Mathilda puxeron o aceno luso dentro dun festival onde a presenza galega tamén foi moi importante, apostando sempre por formacións novas e de calidade, “auténticas xoias por descubrir”, como é o caso da coruñesa Astrogirl, os composteláns Momboi ou os ourensáns Banet. O broche de ouro puxoo o dúo formado polos xa recoñecidos Silvia Penide e Felix Arias, que levaron ao Auditorio do Castelo o seu proxecto conxunto Canciones Ajenas.

Ese día tamén se levaron a cabo outras actividades complementarias como exposicións, obradoiros infantís, intervencións artísticas, charlas, mercado creativo e postos de gastronomía. Outro atractivo do festival é o espazo no que se realiza: o interior do castelo medieval de Ribadavia do século XI, un marco incomparable para un evento destas características e que busca resaltar o seu valor patrimonial.

 

 

 

Ampliamos a MiiC!

Grazas á boa acollida que tivo esta segunda edición da Mostra Internacional de Ilustración Contemporánea, #MiiC2, temos o pracer de anunciar que imos mantela aberta un pouquiño máis! Ata o 31 de marzo concretamente.

Aquí vos deixamos un pequeniño anaco visual do que vos ides encontrar na sala. Non a perdades!

MiiC atópase na Sede Afundación Santiago (Rúa do Vilar 19). A entrada é de balde e abre tódolos días, de luns a domingo, en horario de 12:00h a 14:00h e de 17:00h a 21:00h.

 

ANIMiiC

O 23 de febreiro terá lugar ANIMiiC, a última actividade programada para esta segunda edición da MiiC, Mostra Internacional de Ilustración Contemporánea, que remata a súa andadura o vindeiro 10 de marzo.

ANIMiiC é un ciclo de cine de animación no que se proxectará, entre outros, os traballos dalgúns dos artistas expostos na MiiC, como a galardoada realizadora húngara Réka Bucsi ou o tamén premiado realizador galego Martín Romero. Ademais, contaremos cunha sesión de curtas seleccionadas polo prestixioso festival de animación francés Annecy.

cartel animiic_01 final

Programa de proxeccións:

SESIÓN das 17:00H // SELECCIÓN MiiC

LOVE e SOLAR WALK de Réka Bucsi
LA NOCHE de Martín Romero
SOY UNA TUMBA de khris Cembe

+ coloquio con Martín Romero, director de LA NOCHE e Víctor García, compositor da música de SOY UNA TUMBA.

SESIÓN das 19:00H // SELECCIÓN ANNECY

WEEKENDS de Trevor Jiménez
BLOEISTRAAT de Nienke Deutz
EGG de Martina Scarpelli
BICIKLISTI de Veljko Popovic
BARBEQUE de Jenny Jokela

+ coloquio con Alberto Vázquez, membro do xurado do Festival Annecy na edición de 2017.

Modera os coloquios Javier Trigales.

ANIMiiC terá lugar na Sede Afundación Santiago (Rúa do Vilar, 19). Entrada de balde ate completar aforo.

Encontros Open MiiC

Os días 25, 26 e 27 de xaneiro tiveron lugar unha serie de encontros abertos entre público e algúns dos ilustradores que expoñen na 2ªedición da MiiC, Mostra Internacional de Ilustración Contemporánea.

Aquí vos deixamos un anaquiño da maxia que se viviu durante eses días nos que tivemos o pracer de coñecer máis de cerca o traballo e as persoas que hai detrás das ilustracións. Un auténtico pracer!

Open MiiC nº1 – Héctor Francesch, Luisa Rivera, Malota e Bestiola

Open MiiC nº2 – María Hesse e Bea Lema

Open MiiC nº3 – Helena Pérez García, LaraLars e Iria Fafián


A MiiC pódese ver na Sede Afundación Santiago (Rúa do Vilar, 19) ata o 10 de marzo. Abre tódolos días da semana de 12:00h a 14:00h e de 17:00h a 21:00h. Entrada de balde.

Así foi o Día da Ilustración na MiiC2

Aquí vos deixamos o vídeo resumo das actividades que tiveron lugar o pasado 30 de xaneiro na #MiiC2 con motivo do Día da Ilustración.

Tanto o espazo temporal adicado a Federico Ribas, como o mural realizado in situ pola ilustradora Bea Lema, poderanse ver ata o día 3 de marzo.

Sede Afundación Santiago, rúa do Vilar 19. Horario de 12:00h a 14:00h e de 17:00h a 21:00h. Abre tódolos días da semana. Entrada de balde.

Día da Ilustración na MiiC

O 30 de xaneiro é o Día da Ilustración en Galicia. Unha efeméride que elixe a data do nacemento de Castelao para lembrar e reivindicar o papel dos profesionais da ilustración na industria cultural. Cada ano é homenaxeado un ilustrador histórico galego. O protagonista de 2019 é Federico Ribas, e na MiiC queremos unirnos aos festexos e divulgación da súa obra cun programa especial de actividades que xorden gracias á colaboración de Agpi, a Consellería de Cultura e Afundación. Obra Social ABANCA.

poster.afundacion

Comezaremos o día coa inauguración dun espazo temporal adicado a Federico Ribas, no que se explica de maneira visual a traxectoria artística do autor, e onde se poderá ver unha peza orixinal do artista pertencente á colección de Arte Afundación. A exposición complétase cun mural realizado in situ pola ilustradora Bea Lema que celebra a arte da ilustración.

A inauguración será ás 12:00h no vestíbulo da Sede Afundación Santiago, onde se atopa a exposición e a intervención artística.

Xa pola tarde, a partir das 19:00h, o ilustrador e estudoso SIRO Pintor & Escritor (Siro López) pronunciará unha breve conferencia co título «Federico Ribas Montenegro». E a iso das 20:00h pecharemos o día coa mesa redonda «O oficio de ilustrar: o que está por vir» na que se reunirán, en conversa sobre ilustración e banda deseñada, os autores Anabel Colazo, Andrés Magán e Carlos Arrojo Ilustración, moderados por Bea Lema.

Todas estas actividades son de entrada libre e gratuíta.

 

 

Open MiiC

O 25, 26 e 27 de xaneiro terá lugar Open MiiC, unha serie encontros informais de público e artistas, onde os autores explicarán as pezas que expoñen na 2ªEdición da MiiC, Mostra Internacional de Ilustración Contemporánea. #MiiC2

open-miic3

Horarios dos encontros:

  • Venres 25 ás 19:00h con Héctor Francesch, Luisa Rivera, Malota e Bestiola.
  • Sábado 26 ás 12:30h con María Hesse e Bea Lema.
  • Domingo 27 ás 17:00h con Helena Pérez García, LaraLars e Iria Fafián.

Con esta iniciativa o que se busca é favorecer o diálogo entre obra, artista e público, desentrañando o proceso creativo, a técnica utilizada, a temática que agocha cada peza e o entendemento subxectivo da obra por parte do que a observa. Unha oportunidade para acercarse ao traballo e proceso creativo dos ilustradores e ilustradoras.

Os encontros terán lugar na propia sala de exposicións da Sede Afundación Santiago (rúa do Vilar, 19). Entrada de balde. Aforo limitado.

 

Programa FëLiiC

FëLiiC – Feira de Edición e Libro Ilustrado – 26 de xaneiro

portada post felicc

Programa // Charlas

11:00h | Premios Castelao de Banda Deseñada: a importancia do apoio institucional á edición ilustrada. Interveñen: Goretti Sanmartín, vicepresidenta da Deputación da Coruña; Bea Lema, autora de O Corpo de Cristo; e Oliver Añón, autor de Cancións para afundir flores no mar.

12:00h | Firma de libros de Oliver Añón

13:00h | Presentación do proxecto autoeditado Piale. Diario dunha experiencia educativa, pola autora Ana Moreiras.

16:00h | Clásicos ilustrados: o auxe das reedicións ilustradas da literatura universal. Interveñen: Luisa Rivera, ilustradora de Cien años de Soledad; Helena Pérez García, ilustradora de Orlando; Gemma Sesar, editora en el Patito Editorial; e Chus Costoia Garea de Libraría Pedreira.

18:00h | Feminismo ilustrado: editoriais e artistas que apostan pola ilustración como medio para concienciar na igualdade de xénero. Interveñen: María Hesse, autora de Frida Kahlo. Una Biografía; Malota, ilustradora de Un paseo por la vida de Simon de Beauvoir; Anaír Rodríguez, editora en Xerais e autora de Pioneiras; e Monse Vilar Figueirido de Libraría Lila de Lilith.

20:00h | A edición como ferramenta creativa: autoedición, series limitadas, libro-obxecto, etc. Interveñen: María Álvarez, membro de Colectivo Miñoco e Autobán; Rubén Romero, director de editorial Fosfatina: Manuel Barreiro, membro de Fun Fun Fun; e María Meijide, artista e autoeditora.

Actividades de balde. Aforo limitado.

FëLiiC terá lugar o 26 de xaneiro na Sede Afundación Santiago de Compostela (rúa do Vilar 19) en horario de 11h a 14h e de 16h a 21h.

 

 

FëLiiC: Feira de Edición e Libro ilustrado

FëLiiC é unha iniciativa que xurde como complemento á MiiC, Mostra Internacional de Ilustración Contemporánea de Santiago de Compostela.

cartel redes fëliic

A feira céntrase na edición e autoedición de libros ilustrados dirixidos, principalmente, a un público non infantil, e que están relacionados directamente cos traballos das ilustradoras e ilustradores que participan na MiiC.  

A xornada vaise distribuir en torno a un programa de charlas e mesas de debate que teñen como finalidade acercarnos ao traballo de artistas, editoriais e librarías, facer unha radiografía da situación actual do sector, e indagar nas novas tendencias en canto a contidos e formatos. O evento completase cunha feira onde o público poderá mercar as publicacións das autoras e editoriais convidadas así como as últimas novas dentro do sector do libro ilustrado.

O obxectivo de FELiiC é resaltar a importancia do traballo das ilustradoras e ilustradores á hora de ter que completar unha narración literaria a través das súas interpretacións ilustradas, así como cando se enfrontan ao momento de crear os seus propios proxectos co fin de ser editados ou autoeditados. Ademais, resalta o traballo das editoriais que apostan por edicións moi coidadas onde a ilustración é tan protagonista coma o texto, poñendo así en valor o formato do libro ilustrado como un todo artístico que enriquece e fomenta a lectura.

FëLiiC terá lugar o vindeiro 26 de xaneiro na Sede Afundación de Santiago de Compostela de 11h a 14h e de 16h a 21h. Entrada de balde.